කාර්යබහුලත්වයෙන් පිරි අපේ ගත සිත නිවා සනහාලන සොඳුරු අසපුව නිවසයි.ඒ නිසාම තමන්ගේ නිවහන සුන්දරව හා පියකරුව තබා ගැනීමට සෑම ගෘහනියක්ම උනන්දුයි.තිර රෙදි කලාව යනු තම නිවහන එලෙස සුන්දර අසපුවක් කළ හැකි එක් මගකි.අද වනවිට මෙය හොඳ ආදායම් මාර්ගයක් වී ඇති අතර නිවෙස් හා විවිධ කාර්යාල ආදී ස්ථාන හැඩ කරන ජනප්‍රිය ගෘහ අලංකරණ විලාසිතාවකි.ගෘහ අභ්‍යන්තර අලංකරණයේ ප්‍රධාන අංගයක් ලෙසද මෙය හඳුනාගත හැකිය.
සෑම නිවසකම අතීතයේ තිර රෙදි කලාව පිළිබඳ සැලකිලිමත් වුයේ ධනවත් පන්තියේ ඉතා සීමිත පිරිසකි.එහෙත්,වර්තමානයේ එය සෑම දෙනා අතරම ජනප්‍රිය අංගයකි.තම ආර්ථිකයට සරිලන අයුරින් විසිතුරැ තිර රෙදි නිර්මාණය කරගනිමින් නිවෙසට ආකර්ෂණයක් එක්කර ගැනීමට බොහෝදෙනා උත්සාහ දරනු පෙනේ.
අධික මුදලක් තිර රෙදි නිර්මාණය සඳහා බොහෝ මුදලක් වැය වෙතැයි සමහරු බියෙන් පසුවෙති.එහෙත්,තිර රෙදි නිර්මාණ කලාව නිවැරදිව හැදෑරීමෙන් තමන්ගේ ආර්ථික තත්ත්වයට ගැළපෙන අයුරින් හා අඩු වියදමකින් නිවෙස අලංකාර කරගැනීමට හැකිය.ඔබගේ දෑතින්ම නිර්මාණය කළ තිර රෙදි යොදා නිවෙස හැඩ කරගත හැකි නම් එය මිළ කළ නොහැකි වටිනාකමක් ගෙන දෙන්නකි.
මෙම කලාව පිලිබඳ නිවැරදි දැනුමක්,අවබෝධයක් නොමැති අය විලාසිතාවක් දුටු පමණින් එය තම නිවහනට එක් කර ගනී.නමුත්,තමන් අපේක්ෂා කරන සුන්දරත්වය එමගින් දැකිය නොහැකිය.එම විලාසිතාව තම නිවසේ ප්‍රමාණයට, වර්ණයට මෙන්ම තමන්ගේ ආර්ථික තත්ත්වයට කොතරම් ගැලපෙන්නේද යන්න පළමුව සිතා බැලිය යුතුය.එවිට තිර රෙදි කලාව පිලිබඳ හොඳ අවබෝධයකින් වඩාත් අලංකාරව අඩු වියදමකින් තම නිවෙස හැඩ කරගත හැකිය.
- තිර රෙදි යෙදීමෙන් විශාල ප්‍රදේශයක් කුඩා කර පෙන්වීමටත්, කුඩා ප්‍රදේශයක් විශාල කර පෙන්වීමටත් හැකිය.මේ නිසා තිර රෙදි නිර්මාණය කර ගැනීමට ප්‍රථම තිර රෙදි යොදන ස්ථානය පිලිබඳ සැලකිලිමත් විය යුතුය.
එනම්,
- අදාළ ස්ථානයේ පිහිටීම
- අදාළ ස්ථානයට ලැබෙන ආලෝකය
- බිත්තිවල වර්ණය
- ගෙබිමේ වර්ණය
- ගෘහ භාණ්ඩවල වර්ණය
ආදිය පිළිබඳව ඔබේ අවධානය යොමු කරගත යුතුය.එසේ කළහොත් පමණක් ඔබ අපේක්ෂා කළ ආකර්ශනීය පෙනුම නිසැකවම නිවහනට ලැබෙනු ඇත.
- ආලෝකය අඩුවන ස්ථානවලට තිර රෙදි යෙදීමේදී අඳුරු පාට නොමැති ඝනකමින් අඩු තිර රෙදි භාවිතා කළ යුතුය.ලේස් රෙදි වර්ග, ඕගන්දි, ඕගන්සා, ෂියර් වැනි රෙදිවලින් ආලෝකය විනිවිද ගොස් අඳුර අඩු කරයි.
- තද වර්ණ හා අඳුරු වර්ණ ආලෝකය තදින් වැටෙන ස්ථානවලට සුදුසුවන අතර එවැනි ස්ථානවලට යටින් තුනී රෙද්දක් ද, පසුව ඝනකම් තිර රෙද්දක්ද දමා ඉදිරියෙන් තිර රෙද්දේ ඉහළින් පෙල්මට් එකක් යොදයි.එමගින් වැඩි අලංකාරයක් ඔබේ නිවසට එක් කර ගත හැකිය.
- කුඩා මෝස්‌තර සහිත තිර රෙදි යෙදීමෙන් නිවසේ විශාලත්වය පෙන්නුම් කරන අතර විශාල මෝස්‌තර සහිත රෙදි යෙදීමෙන් එම ඉඩකඩ අඩුකර පෙන්වයි.
- මුළු නිවෙසටම ආලෝකය ගමන් කළ හැකි තිරරෙදි නිදන කාමරයට සුදුසු නොවේ.එම කාමරයේ කෙටි ජනේල පිහිටා තිබුනද දිග තිරරෙදි යෙදීමෙන් ආවරණය මෙන්ම ආරක්ෂාව සහ වැඩි අලංකාරයක්ද ගෙන දෙයි.
- නිවසේ විසිත්ත කාමරය මෙන්ම මුළුතැන්ගෙයද සිත සනහාලන තැනක් විය යුතුය.ඒ නිසා මුළුතැන්ගෙයට යොදන තිරරෙදි පිළිබඳවද සැලකිලිමත් විය යුතුය.ඊට බොහෝවිට කෙටි තිරරෙදි යොදා ගැනේ.එමෙන්ම සැමවිටම ඇසට ප්‍රිය, සිසිලසක් ගෙනදෙන වර්ණ යොදාගැනීමට කල්පනාකාරී වීම වැදගත්ය.
- කුඩා දරුවන්ගේ කාමර සඳහා ඔවුන්ගේ ළමා ලෝකයට සරිලන මෝස්‌තර සහ වර්ණ තෝරාගත යුතු අතර දිග තිරරෙදි දැමීමද සුදුසු නොවේ.
තිර රෙදි මැසීමට පෙර ඒ සඳහා අවශ්‍ය කෙරෙන මුලික ද්‍රව්‍යයන් හා උපකරණ හඳුනාගත යුතුය.ඉතින් මෙවර අපි ඒ අමුද්‍රව්‍ය සහ උපකරණ මොනවාදැයි හඳුනා ගනිමු.
ටේප් වර්ග
ප්‍රධාන වශයෙන් අපට නෝමල් ටේප් (normal tape) , පෙන්සිල් ප්ලීට් ටේප් (pencil plate tape) , ස්මොකින්ග් ටේප් (smocking tape) , අයිලට් ටේප් (eyelet tape) වශයෙන් ඇත.මෙම සියලුම ටේප් වර්ගයන් වෙළඳපොලෙන් මිලදී ගත හැක.මෙම ටේප් වර්ග සුදු පැහැයෙන් පටි රෝල් වශයෙන් ඔබට මිලදී ගත හැකිය.තිර රෙදි පෝල්ස් මත රැඳවීම සඳහා යොදා ගන්නා හුක්ස් දමා ගැනීමට මෙම ටේප් වර්ග අපට උවමනා වේ.
නෝමල් ප්ලීට් ටේප්
ඉතා සරල මෙන්ම අඩු රෙදි ප්‍රමාණයකින් වගේම අඩු වියදමකින් නිර්මාණය කරගත හැකි තිර රෙදි විලාසිතාවක් ලෙස නෝමල් ප්ලීට් ටේප් හඳුනාගන්නට පුළුවන්.
පෙන්සිල් ප්ලීට් ටේප්
මෙම පෙන්සිල් ප්ලීට් ටේප් මෙන්ම ස්මෝකිං ටේප් යන දෙවර්ගයම යොදා නිර්මාණය කර ගන්නා තිර රෙදි සඳහා වැඩි රෙදි ප්‍රමාණයක් අවශ්‍ය වේ.එම නිසා වැය වන මුදලද අධිකය.නමුත්,ඒවා ඉතාමත් අලංකාරය.වටිනා පෙනුමක්ද ලබා ගත හැකිය.
ත්‍රී ප්ලීට් ටේප්
මෙය යොදා නිර්මාණය කර ගන්නා තිර රෙදි සඳහා මධ්‍යස්ථ රෙදි ප්‍රමාණයක් අවශ්‍ය වේ.ඒ වගේම මෙයට ත්‍රී ප්ලීට් හුක්ස් ද යොදා ගනු ලබයි.
හුක්ස්
හුක්ස් යනු තිර රෙද්ද පෝල්ස් මත එල්ලීම සඳහා යොදාගන්නා තරමක් විශාල හක් වර්ගයකි.මෙයද, වර්ග කිහිපයකින් දැකගත හැකිය.
ඉහතින් සඳහන් කළ නෝමල් ටේප්, පෙන්සිල් ටේප්, ස්මෝකිං ටේප් වර්ගයන් සඳහා මෙම නෝමල් හුක්ස් භාවිතා කරනු ලබයි.
ටසල්
තිර රෙදිවලට තවත් අලංකාරයක් එක් කිරීම සඳහා ටසල් වර්ග එක් කිරීමට පුළුවන.මේවාද ඔබ තෝරාගන්නා තිර රෙද්දට ගැළපෙන පැහැයෙන් විය යුතුය.විවිධාකාර වූ මොස්තරයන්ගෙන් මෙන්ම විවිධාකාර වූ ප්‍රමාණයන්ගෙන් ඔබට වෙළඳපොලෙන් මේවා මිලදී ගත හැකිය.
පෝල්ස්
පෝල්ස් යනු බිත්තිය මත රැඳවිය යුතු තිර රෙද්ද බිත්තිය මත දරා සිටීමට උපකාරී වන දිග බාර් එකකි.
මෙම පෝල්ස් සඳහා ඔබට ස්ටීල් ( සුදු යකඩ ) යොදා ගැනීමටත් පුළුවනි.ඒ වගේම ගෝල්ඩ්, සිල්වර්, බ්‍රොන්ස්, බ්ලැක් ආදී වර්ණයන්ගෙනුත් ඔබට මෙම පෝල්ස් වෙළඳපොලේදී දකින්නට පුළුවන.
ඒ වගේම විවිධ දැව ආශ්‍රයෙන් විවිධ මෝස්‌තර අනුවත් මෙම පෝල්ස් ඔබට නිර්මාණය කරගත හැකිය.
අයිලට් තිර රෙදි
මෙම වර්ගයේ තිර රෙදි සඳහා වර්තමානයේ කාන්තාවන් වැඩි කැමැත්තක් දක්වනු ලබයි.අයිලට් ටේප් මෙන්ම අයිලට් පමණක් සවිකර ගැනීමට හැකිවන අතර මෙම අයිලට් තිර රෙදි එල්ලා ගනු ලබන්නේ පෝල්ස් යොදා ගනිමිනි.
ටයි බෑන්ඩ්
තිර රෙදි ටයි අප් කිරීම සඳහා (එකතු කිරීම සඳහා) ටයි බෑන්ඩ් විවිධ වර්ණයන්ගෙන් මෙන්ම විවිධ වූ මොස්තරයන්ගෙන්ද වෙළඳපොලෙන් ඔබට මිළදී ගත හැකිය.
No comments:
Post a Comment
plz,give me your ideas..